Tre sukcesa INA-kunsido dum la UK en Bjalistoko, Pollando

La kunsidon de INA dum UK en Bjalistoko, Pollando ( ĵaŭde la 30-an de julio 2009) partoprenis pli ol cent interesuloj pri naturkuracadoj. Multaj staris, eĉ antaŭ la pordo. La prezidanto de UMEA (Universala Medicina Asocio), D-ro Imre Ferenczy ankaŭ salutis la ĉeestantojn.

La temoj estis:

1.  Enkonduko (pri la laboro de INA) (s-ro Harald Schicke, naturkuracisto, Germanio)
2.  Diferenco inter klasika ("scienca") medicino kaj naturkuracado (Harald Schicke)
3. Kial naturkuracado efikas? (Kees Ruig, Nederlando)

Junio 2009, prelego en Karlovo, Bulgario

Dum la Internacia seminario "Apliko de Esperanto en la faka kaj profesia agado" en Karlovo, Bulgario, s-ro Harald Schicke reprezentis nian asocion. Li prelegis pri la aplikado de korea ginsengo en la kuracado de kanceroj.

Aprilo 2009, prelego dum PSI en Germanio

La prezidanto de INA, Harald Schicke, prelegis la 13-an de aprilo dum PSI pri sia vojaĝo al Norda Koreio.
La prelego pri Norda Koreio kaj ginsengo dum Printempa Seminario Internacia (PSI) allogis multe da homoj -
la salono estis plenplenega. Homoj staris aŭ sidis sur la planko, eĉ en la koridoro antaŭ la prelegejo.

La prezidanto de INA, s-ro Harald Schicke, estis invitita al Norda Koreio de la renoma Hanns-Seidel-Fondaĵo por
prelegi pri la eksporteblo de ginsengo kaj kuracherboj al Eŭropa Unio. La prelego estis tre sukcesa - anstataŭ anoncitaj 35 venis 75 aŭskultantoj.

   Jen kelkaj partoj el lia prelego:

"Dum nia vizito al Pjongjango ni havis eblecon viziti la Universitatan Hospitalon, kie ni estis salutataj kaj gvidataj de la direktoro Prof. Mun Sang Min kaj Prof. Sok, kiu perfekte parolas la germanan lingvon.

Tiu akcepto estis granda honoro, ĉar kutime vizitantojn akceptas subuloj. En la hospitalo de la universitato kuniĝas naturkuracado kaj scienca medicino.

Ni kompreneble vizitis la naturkuracan parton, kie oni aplikas la tradician korean kaj ĉinan medicinon, kiun oni nomas en Norda Koreio Koryo-medicino.

Krome ni havis eblecon viziti vendejon de kuracherboj kaj vendejon por ginsengo. Ği kreskas en la regiono de Kaesong... "

Decembro 2008, prelegoj dum la Internacia Festivalo
en Düsseldorf, Germanio

En la tempo de la 27-a de decembro ĝis la 3-a de januaro 2009 en Düsseldorf, Germanio okazis la tradicia Novjara Internacia Festivalo kiun aktive partoprenis ankaŭ membroj de nia asocio. Enkadre de tiu festivalo nia asocio faris tri prelegojn pri naturkuracado por siaj membroj kaj la aliaj partoprenantoj de la festivalo:

Mantro - meditado kun Kees Ruig (Nederlando)

Mantro - meditado kun Kees Ruig (Nederlando). Mantro - budhisma formulo, tirita el sankta libro kaj ripetata dum la intensa koncentriĝo. Mantro turnas sin al nia interna memo, ĝi estas maniero por sin konekti al pli profunda ekzisto. La ripetadaj ĉandoj (formo de kantado) kaj ritmoj el mantra muziko kreas pozitivan trancon, forportantan vin de via emocia memo. Mantra muziko kreas spiradan patronon kiu unuigas la korpon kaj la animon.

Prelego pri kupado

(Harald Schicke, Rosa kaj Waldemar Ebel, Germanio)

Kio estas kupado? La principo de la kupado estas krei vakuon sur haŭto-surfaco. Tiel sango el pli profundaj tavoloj, ekz. internaj organoj venas al la haŭto kaj senŝariĝigas la organojn. Tion ni nomas forfluigo.

En Germanio oni uzas ankaŭ sangan kupadon. Tion ni nomas elfluigo, ĉar tiel la organismo povas eligi malbonajn substancojn.

Priskribojn de kupadvitraĵoj oni trovas jam en antikva Egiptio. En klasika Grekio kupado estis tiel aprezita, ke la kupadkloŝo fariĝis emblemo de kuracistoj.

Legu plue pri kupado en la  INA-revuo 01-09  kaj ĉe Wikipedia

Prelego pri la metabola sindromo

(Harald Schicke, Germanio)

Metabola sindromo, ankaŭ nomata "mortiga kvaropo", estas la kombino de minimume tri afekcioj de la metabolo:

adipozo,  alta sangopremo,  perturboj en la metabolo de graso,  diabeto.

La preleganto analizis diversajn afekciojn kaj informis, kiel preventi aŭ kuraci ilin naturkurace.